afterheader desktop

afterheader desktop

after Header Mobile

after Header Mobile

آش لي باقي ما درتوه؟

ليلى البصري

واحد شبعان و مكرع
بخير البلاد ممتع
و بفلوس الشعب مبرع
و بالأنانية متشبع…
و هو صحيح… فالمغرب يبرطع
و إلا مرض… للخارج يقطّع
فالكلام تلقاه سبع
و عند الصح تلقاه ضبع

* * * * * *
و واحد كاعي على الاوضاع
كما حنا كاع…
اللقمة يجيبها بالدراع
واخا يكون مقلاع
المستقبل منو ضاع
يمرض و لا يصح…
اش غادي يوقع كاع
واش القبة كيف القاع؟

* * * * *
شكون دار منك قبة
و شكون دار منا قاع
ياك كنتِ غير حبة
سير عطينا التيساع
و دابا شبعتِ حبة
على بالك انت مقلاع
راه الشعب على سبة
و الأمل منو ضاع

* * * * *
بركة من الاستبداد
حتا نتا راك من الشعب
و إذا اليوم ظلمك زاد
فكر غدا فين تهرب
هذا شعب ماشي جراد
راك على راسك تكذب
ما تسوى حتى براد…
و خرج منك هاذ العجب

* * * * *
على زمانك كلشي شح
حتى الشتا مع الزرع
مكاين أمل مكاين ربح
حتى الضو تبدل بالشمع
و الراجل محزم و يشطح
هاذ الشي ولا كيخلع
لي يتحرق!!! و لي ينطح
و لي بالوسام يتفطّح

* * * * *
الحكرة علينا زادت
بركة من البسالة
و الهيبة منا ضاعت
ملي ضربتنا “تافالا”
واش قلوبنا لي ماتت
و رميناها للزبالة…
و لا الهمة لي غابت!
بسبة دوك الطبالة؟؟؟؟

* * * * *
الشعب كامل ريشتوه
استعبدتوه و حكرتوه
و لي فلت رقدتوه
سكتوه و بنجتوه
حتى الأستاذ ذليتوه
قدام العالم بهدلتوه
و لي تكلم حبستوه
آش لي باقي ما درتوه؟

تعليقات الزوار
جاري تحميل التعاليق...

شاهد أيضا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على هذا ، ولكن يمكنك إلغاء الاشتراك إذا كنت ترغب في ذلك. موافق المزيد