كي الوزير كي مول الحوت…
ياك العمر لحظة و تفوت
و بنادم تابعاه الموت…
آش وجّدنا لها يا الخوت
ملي نتهزو فداك التابوت
ها البكا… ها الهيوت
عزرائيل ما عندو خّوت
كي حليمة كي الياقوت
كي الوزير كي مول الحوت
كلشي يموت… يموت…
/ / / / / / / / /
سعدات لي فهم قبل ما يودع
ما بغا على عرش الدنيا يتربع
الكلب حاشاك، كبحال الضبع
كلشي كينبح، كلشي وَلاّ سبع
و بنادم ولّا أرخص من الشمع
فزمان كثر فيه الذل و الطمع…
و غابت فيه النخوة و البْصَر و السّمَع
شحال قدك من خنز الدنيا ما تجمع
ما ظنيت مال قارون عند ربك لك يشفع
/ / / / / / / / /
أجي نحسبوها كاملين!!!
شحال لحستِ من كرعين؟
حتى وصلتِ للمواطنين
شحال خنتِ من يمين؟
شحال بكّيتِ من عينين؟
باش تشرب من راس العين
شحال زرعتِ من مساكين؟
غير ضسارة و تفرعين
شحال جنيتي من مهاجرين
شحال من أرملة و مسكين؟
قدام الله تلقاهم واقفين
/ / / / / / / / /
باش تنفعك موالك
إذا مولاك كاره حالك
حتى حد ما قالها لك؟
كلشي بسبتك هالك
قول لي باش نفعك مالك؟
ياك غير زاد فهوالك
و زاد فشقانا و غذابك
و اذا نسيتِ راك هالك
الموت وراك… رد بالك
/ / / / / / / / /
تفكر فالقبر و عبابو
قبل ما ينزل عليك ترابو
و رجع لمولاك تصطابو
راك ما تقدر على عذابو
و تفكر أحبابك لي غابو
شحال فهاذ الدنيا ذابو
شحال دّاو شحال جابو
رجع شي حد لصحابو؟
لي دار شي تما صابو
|
|
|
شاهد أيضا :
التعاليق