طارت معزة و خلاص
شفت بلادي مزوقة و فرحت
ظنيت العيد جا ثاني
ملي سولت شحال تصدمت
هاذا غير داك البرلماني!!!
شوك زرعناه بينا و نبت
الكل بسبابو كيعاني
ضحك علينا قاولنا و سلت
و بوجهو حمر راجع ثاني
~~~~~~~~~~~~~~~~~~~~~~~~~~~~~~~~~~~~
الموسم هاهو قريب
شكون بغا يترزّق
وجد راسك يا الذويب
بيعها و سير راك نزق
فبلادك ديما نتا غريب
و ما لك فيها رزق
ملي ولى المغرب سليب
ما بقا فيه غير البق
~~~~~~~~~~~~~~~~~~~~~~~~~~~~~~~~~~~~
قال لي جاري البارح
الانتخابات راها بدات
شنو ندير راني كادح
و فعنقي حزمة دالبنات
على تمارة نبات صابح
فيها نظل و فيها نبات
لا مستقبل لينا واضح
و لا لقينا حتى الفتات
~~~~~~~~~~~~~~~~~~~~~~~~~~~~~~~~~~~
يا جاري فيق من رقادك
كن على بال راك وسيلة
انت العبد و هما سيادك
و بيك نوضو التقربيلة
داو صوتك و حتى بلادك
و كتمو حسك بسبرديلة
على كل حال راك هالك
نتا و انا و كاع القبيلة
~~~~~~~~~~~~~~~~~~~~~~~~~~~~~~~~~~
كلشي خارج كيغوت
واش هذا كلو إخلاص
حب الوطن فكل وقت
ماشي غير عند الخلاص
واش المسلوق كينبّت
ولا طارت معزة و خلاص
ضرب و قيس لا تفوت
دابا تجي ساعة الخلاص
|
|
|
التعاليق